Dr Noah Songtext
von Mani Matter

Ds nächschte Lied isch nach ere Gschicht wo dr ganz sicher scho kennet
Es isch d Gschicht vom Noah,
Vom Noah us dr Bibel u vo sine Mitmönsche
Lang ischs här da het mal eine öppis afa boue
Öppis wie ne grosse Chaschte de Lüt wo si cho gschoue
Hei ne gfragt was söu das gäh, es Schiff het dise gseit
Aber sisch keis Meer gsi und kei See dert wiit und breit

Und me begrifft das d′Lüüt hei gseit däm Maa däm spinnts
Und si hei d'Chöpf ersch rächt gschüttlet wo das Schiff do später
Het e längi übercho gar vo drüühundert Meter
Füfzig Meter Breiti drissig Höchi und du noh
Sitlech i dr Wand e rise Tüüre dri isch cho
Und me begrifft das d′Lüüt hei gseit däm Maa däm spinnts


Und si hei ne gseh its Schiff näh Löie und Giraffe
Nachtigalle, Zebra, Elefante, Söi und Affe
Schlange, Chüe, Rhinozeros, Gazälle, Dromedar
Känguru und Kolibri vo allem gäng es Paar
Und me begrifft das d'Lüüt hei gseit däm Maa däm spinnts

Und wo d'Tier si drin gsi isch är sälber de mit sine
Söhn und sire Frou und sine Schwigertöchter ine
D′Lüt hei sich versammlet und g′holleiet usse draa
Wo n'är hinter sich die grossi Tüüre zu het daa
Und me begrifft das d′Lüüt hei gseit däm Maa däm spinnts

Aber druuf hets afa rägne wie no nie uf Ärde
Langsam het me d'Fluet gseh schtige und gäng höcher wärde
Mau noh het dr Maa im Schiff ghört rüefe löht üs drii
Aber gli druf isch zäntume Totestilli gsi