I bin a Uhu Songtext
von Sigi Maron

Auf da Strossn liegt a Blada
Seit zwa Stundn in seim Bluat
Und i frog mi wos da Blade
In seim Bluat durt suachn tuat
Nebn mir stengan Passantn
De wos si des söbe frogn
Do hebt da Blade sein Schädl
Und mir hern eam olle sogn

I bin a Uhu, i bin a Uhu
I woit Fliagl kriagn
Und daunn in Himmel fliagn
Und wer bist du


Nebn dem Bladn liegt a Spritzn
Aus der tropft a weissa Soft
Und de Leit sogn schauts a Giftla
Und de Giftla g′hern verhoft
A Passant der frogt den Bladn
Ob ma eam net hölfn kaun
Oba jo, geh bitte schleichts eich
Schauts wem aundern teppat aun

I bin a Uhu, i bin a Uhu
I werd Fliagl kriagn
Und daunn in Himmel fliagn
Und wer bist du

Kana geht und olle wortn
Wia de G'schicht jetzt weida geht
A Gestoit im schworzn Mauntl
Drängt si vur schreit Leute seht
Dieser hier braucht den Erlöser
Siehst du nicht sein Angesicht
Bist du Jesus frogt da Blade
Nein der Jesus bin ich nicht

I bin a Uhu, i bin a Uhu
Ich werde Flügel kriegen
In den Himmel fliegen
So wie du


I wü allan fliagn sogt da Blade
Wäu i wor allan bis heit
In dem Laund muass ma erst durchdrahn
Daun bemerken an de Leit
Konsumiern hasst eicha Rauschgift
Wachstum, Fortschritt und der Schaß
Wer net mitmocht oder mitkummt
Inhaliert im Bockrohr Gas

I bin a Uhu, i bin a Uhu
I werd Fliagl kriagn
Und daunn in Himmel fliagn
Und wer bist du

I siach den Hoss und de Gewoit
I siach de Aussichtslosigkeit
I siach den Schleim der eich z′saumhoit
In eichara Abgeschlossnheit
I siach eich stehn aum Höldnplotz
Mit gschlossne Augn und offnen Mäu
Und eichre Pappn hör i flüstern
Gaunz Österreich is high

I bin a Uhu, i bin a Uhu
I werd Fliagl kriagn
Und daunn in Himmel fliagn

I bin a Uhu, i bin a Uhu
I werd Fliagl kriagn
Und daunn in Himmel fliagn
Und waunn fliagst du