Jode Morje Kölle Songtext
von Kasalla

Et es fass schon Daach, ävver ich ben noch wach
Sitz he un waad op de Bahn un luur dich einfach nur aan
De Stroßefäjer sin ald do, dä Ress vum Fess weed wegjefääsch
E paar I-Dötzche maache sich zo Fooss op de Schulwääch

E Büdche määt op, et jitt Kaffee un Express
Un an d′r Ladezoon waad schon die eetste Politess
Ich nemm ne Becher op de Hand
Setz mich am Rhing op en Bank un zäll die Welle

Schöne jode Morje Kölle

Dä Pennbroder do will mir ne Querkopp verkoofe
De Mamm stillt et Kleen, ne Dackel hät sich verloofe
Do häs esu vill Jeseechter, Schatte und Leechter
Bes hässlich un schön, ne junge Stenz, en ahl Möhn


Un all die Bedrömte soße ald he op d'r Bank
Met Jittar un Aktetäsch - Bänker un Punk
Un irjendwie häs do et jeschaff, dat se all op dich stonn
Vür dir muss sich keiner verstelle

Schöne jode Morje Kölle
Schöne jode Morje Kölle

Ich wor ald en Bangkok, en Rom un Berlin
Wor en Fronkreich un en Spanien, en Vegas un Wien
Ävver ejal, wo ich opwach, ejal, wo ich ben
Die Nodel vun mingem Kompass zeich immer zo dir hin

He ben ich jeboore, he künnt ihr mich bejrave
Met Blömcherkränz un Kamelle

Schöne jode Morje Kölle

Schöne jode Morje Kölle

Schöne jode Morje Kölle