Hundert mohl Songtext
von BAP

Wie stonn ich neuerdings vüür dir? Wie vüür ′nem Fremde, wie blamiert. Ming Vis-a-Vis em Spejel ess von mir entsetz. Et kann Jedanke lese un et sieht en Flut, die eskaliert – en Flut, met der et nie em Draum jerechnet hätt. Spürt: Ming Latein ess koot vüür'm Schluß, weiß kaum noch wigger, doch ich muß, mich, dä Kassandrarufe su jähn övverhührt, sich met jottweißwat arrangiert, öffentlich Eins-A funktioniert. Mich mäht jet, wat ich nit erkläre kann, bestuß. Ejal, ob Rotterdam, ob Wien, bloß Bühne krißte noch ze sinn. ′T kütt vüür, dat do dodrop em Ritual verflachs. Un immer seldener jelingt et dir, wodrinn 'ne Sinn ze sinn, je mieh de dich von Titelbilder selvs ahnstarrs. 'T weed surrealer Daach für Daach un isolierter Naach für Naach. Föhls dich wie′n Kääz, die merk, dat se och ungen brennt. Die trotzdämm enjemeißelt, routiniert wie Stewardesse laach un sujar Angs vüür Stagnation nutfalls verdräng. Do schriefs jetz hundertmohl: "Ich soll bei Ruut su winnisch waade wie bei Gröön. Wenn′t Jähl weet, will ich jonn." Mer hätt sich vill ze schnell ahn all dä Müll jewöhnt. Kumm her, mir drinken eez ens eine op uns Kralle, die nit kratze, unser scheinduut Meer uss Träne un uss Wut, en dämm uns Hoffnungsfunke noh un noh wie Seifebloose platze. Ussjeixt wie op ner Fahndungslist – met ruut. Op dich, do Gigolo ahm Fließband dinger Sensibilität, die Ziele, die do uss em Bleck verloore häss. Wo ohne Frönde mir wohl stünde? Op all Sünde, övver die mer nie e Woot verliere, op die drink' mer jetz. Mer mössen russ uss dä Sackjasse, die du Kismet nenne wills, dä komfortable Fall, en die dö ständig fälls. Russ uss dä Einbahnstroße, die jepflastert sinn vun dämm Jeföhl, dat do dir selden enjestehß, datte verstells. Schrief dir die Finger wigger bloodisch, schrei et russ, su laut de kanns. Dann lääsch die Zäddel övverall hin, dat jet bliet, von dämm, wat wir jraad nit zem eezte Mohl begriffe hann, op beidze Sigge vun dä silverne Jlasschief.