Jakob A Songtext
von Tinu Heiniger

Was du hie ghörsch, isch Gschicht vom Jakob A
Gschicht vo mänä Mönsch wie du u i
Gschicht vo mne Fründ vo dier vom Nachbar näbä dra
U s′chönnt ou Gschicht vo mir, i wo hie von ihm singe sy

Ja, u s'isch ou Gschicht vo dene, wo sech hinger Gsetz u Norme
Verstecke, wo sech hei a Paragraphe, Zwäng
Gschicht vo so Lüt, wo üs, so wie sy worde sy, wei forme
So abglöscht, apasst, läär u stuur u so äng

I nime a, me het ne in es Gitter ta
Aus chly, dert söu er lehre loufe
U schlaft er schlächt, bingt me ne a
Me lehrt ne ds Bäte, ds Frommsy, laht ne toufe

Ir Schueu chlemmt me ne zwüsche Stueu u Bank
U ar Schueu da macht er u het Schwyrigkeite
Bim Vatter z′bure stinkt ihm, s'macht ne chrank
Sech ständig la z'befähle u la z′leite


Nar Schrynerlehr, da geit er ines Chloschter, fingt dert ang′ri Wärte
Me düngt mit ang'rem Mischt derthie an ang′re Wäg
Doch merkt er gly, wie ou i dene Gärte
D'Blueme verdorre hinger Muure, Züün u Häg

U zrugg im Bruef, da fingt er au die aute Zwäng
Fingt aber näbedrann ou Fründe, Froue
Dert redt me ändlech über sich u d′Gseuschaft, über d'Zämehäng
U dene Lüt, wo zwyfle, frage, faht er a vertraue

Wo einisch znacht d′Fründin wott bin ihm blybe
Gits Lüt, wo's stört, we me sech gärn het u mitnang wett pfuse
Vo dene wird er wäg Unsittlechkeit vertrybe
Und ou dä, wo ner für ne gschaffet het, dä gheit ne use

U wo ner hei geit u dert Krach het, nimmt er a
Jetz sig aus gäg ne, kene wöu ne, chönn ne me verstah
Ir Wuet, ir Arigscht in, weiss er nume no, s'muess öppis ga
Und är wott aus, wo ne kaput macht, zämeschla

U wo ner seyt, jetz göng er afe zu däm Dokter hei
Dä, wo ne mit syr Analyse ja ou nume heig verchouft
Dä löi er um, u wo ner ds Gwehr hout, hout ne Polizei
U bringt ne ine Klinik, ine Mühli, wie bi üs so mängi louft


Me bingt ne a, me macht ihm Sprütze, git ihm Pille
Vo Stromschöck muess er sech la zämestuuche
I Wachsääu, Zäue, bricht me siner Gfüel, si Wille
Me macht ne wieder zum ne Mönsch, wo me cha bruuche

Was du hie ghörsch, isch Gschicht vom Jakob A
Gschicht vo mänä Mönsch wie du u i
Gschicht vo mne Fründ vo dier vom Nachbar näbä dra
U s′chönnt ou Gschicht vo mir, i wo hie von ihm singe sy

Ja, u s′isch ou Gschicht vo dene, wo sech hinger Gsetz u Norme
Verstecke, wo sech hei a Paragraphe, Zwäng
Gschicht vo so Lüt, wo üs, so wie sy worde sy, wei forme
So abglöscht, apasst, läär u stuur u ou so äng

U jetz faht Gschicht vom Jakob A ersch a
Jetz isch er gstämplet, jede weis, dä spinnt, dä Ma
U wo ner use chunnt, da luegt ne jede gschpässig a
Wär wett zu eim, wo us der Mühli chunnt, Vertraue ha

U wo me seyt, är chönn nümm über sich verfüege
Ar müessi jetz haut e Vormund ha
Da gloubt er's, ungerschrybt, wott dene gnüege
Wo säge, ′syg guet für'ne, keiner Rächt me z′ha

Nach angerhaub Jahr Klinik läbt er, wie sech's ghört
Ar schaffet stiu u flyssig, wie′s so Bruuch isch i däm Land
Wo jede vor sech häre büglet, kene streikt u kene stört
Stört eine glych, despinnt er äbe, oder isch elingge, e Vagant

Doch so ne Stämpu wott er nümm, er wott wieder sys Rächt
Ar het sech apasst und är bruucht ke Vormund meh
Das schrybt er dene, wo ne hei verruumt, doch die verstöh ne schlächt
S'isch äbe schwär, so hinger Bürotische füre Mönsche z'gseh

U kene wo ne laht la warte, laht la stah
E kene gseht ne i de Nächt, wo när kes Oug zue tuet
Ke Gmeinrat u ke Brüetsch, ke Psychiater fragt derna
Was mit ihm los isch, kene gspürt si Angscht, si Wuet

Und är kämpft wyter, wüeu är sich nid ufgä cha
Rysst Brätter vo de Chöpf u kämpft gäg Härz us Stei
Gäg Awäut, wo ne bschysse, Dökter, wo ke Zyt wei ha
U kämpft u laht nid lugg - u isch aley

U wo ner ändlech, ändlech nach Jahre
E Mönsch fingt, e Regierigsrat, wo ne probiert z′verstah
De muess er haut no mau dür d′Mühli, s'git es nöis Verfahre
Är muess bewyse, dass er jetz ke Vormund me muess ha

Di glychi Klinik, mit de Dökter woner nümme cha usstah
Macht ne nomau e chli kaput u seyt när: "Guet
Jetzt chöit Dir ga, sit wieder normau, e ganze Ma!"
U üs blybt si kaputi Gschicht, si Wuet!

Was d′ghört hesch hie, isch Gschicht vom Jakob A
Gschicht vo mänä Mönsch wie du u i