Heimatlos Songtext
von Tinu Heiniger

Dim Vater si Vater het Hüser u Land
Isch Buur u Soudat i sim Vaterland
Befiut u schlat dri mit syr Vaterhand
Wi Väter so drischlöh im Vaterland

Dim Vater si Vater het Chüeh u het Gäut
Het Olive, Melonä u nüt wonim fäut
Het Büez Frou u Chinn u aus het si Sinn
Är kennt d Lüt im Dorf u d Lüt kennä ihn

Di Vater isch starch u isch gschyd scho aus Chind
Ar isch schnäu wi där Blitz u steckt d Nase i Wind
Är lehrt im Koran u list Zytig, studiert
Was dusse ir Wäut ussä aus so passiert

Di Mueter ä Frou us äm Dorf näbädra
Di isch scho vergäh a nä annere Mah
Di Aute chöi wüetä u tue wi si wei
Di Vater dä hout si ir Nacht zu sech hei


O wi schön seit di Vater vorm Tor zu dä Lüt
U glich seit sy Vater us däm gyt äs nüt
Won är d Ängi u d Süeni nümme ertreit
Seit di Vater zur Mueter i gah und är geit

Är suecht Büez i där Schwyz, jedi Büez isch ihm rächt
Ä Buur imänä Dorf suecht ä biuigä Chnächt
U är wärchet u schwitzt, schickt sy Lohn i d Türkey
U nach Jahrä ir Schwyz flügt är ds erschtä Mau hei

Du hocksch uf där Stägä u Türä geit uf
Ä bärtigä Ma chunnt d Stägä ds düruf
Itz wott är di näh, Mami hiuf, s chunnt ä Ma
Du bisch nid mi Vater, la mi los, la mi la ga

Aber gly scho packsch ds Bäbi u ds Nachthemmli i
D Grossmuetär, u d Fründin u d Chatz die lasch hie
U no einisch luegsch zrugg zu däm Hus bir Mosche
U vo Istambul flügsch i paar Stunn ds mits i Schnee

Du Mammi, du Mami wie redä die Lüt
Die redä mit mier u i verstah nüt
Du Mami, du Mami i bi so allei
U wärum chunnt där Vater äm Abe nümm hei


Där Buur isch scho rächt u glych bin i hie
Lang gnue där Gib-, Häb- u Zünd-Chnächt gsy
Seit di Vater ir Beiz u plötzläch spiut hie
Där Türgg usäm Dorf Monopoly

U du schteisch allei uf äm Schueuhusplatz
Verdrückt imänä Eggä: Tschou Türkilmaz
Äm Mittag nüt ds Ässä u niemmer dahei
O Allah wenn flügä mier zrügg i d Türkey

Am Morgä där Vater vor där Tür isch cho
Du ds Mittag im Flügär nach Istambul
Gäu Mami, gäu Vater, bitte gäu, löt mi hie
I wett so gärn hie bi mim Grosmueti sy

O aus isch so schön dert so gar nüt isch schlächt
Aber gly scho bisch ds Dienstmeitschi, d Chöchi, där Chnächt
U där Vater vom Vater schlaht oh widär dri
Värprüglät d Grossmuetär, di chlyn Brüetsch u di

U itzä schleppsch Wasser, housch Houz u machsch Brot
Geisch i d Schueu, luegsch zum Brüetsch
U vor Müedi haub tot sinksch am Abä i ds Bett
U det grännisch u itz wettsch numä zrügg zu dim Mami id Schwyz

U widär flügsch zrugg, u widär hets Schnee
I däm Dorf det im Thurgau det am Bodäsee
U widär allei uf äm Pousäplatz, u widär
Tschou Fettsack, tschou Türkilmaz

Aber itz itz bisch eutär u stercher u scho gly
Stecksch nümme nume I, teilsch o us u schlasch dry
O där Lehrer hets zue där u nähr mit där Zyt
Darfsch sogar mit där Klass ids Schilager mit

Ändläch wäg vo dähei, wäg us dä vier Wänd
Ke Zopf uf äm Chopf meh u aus nid so äng
U itz luegsch i Spiegu: Das, das, das bin i
U gsesch di u gsesch ds Läbä wis ouno chönnt si

Ä Frou wo uf zmau sich säuber wott sy
So eini macht Angscht u di Vatär schlaht dri
U är schlaht der di Tröim u di Plän us dim Chopf
U nö Mueter mit Chopftuech wot ä Tochtär mit Zopf

Aber du luegsch i Spiegu u det, det gsesch di
U weisch, das isch mis Läbä über das bestimmä n i