I han Songtext
von Sektion Kuchikäschtli

I han ab und zua as Schiissgfühl amna lausiga Tag
Wo ni weiss, i han öppis, doch i chann nid gnau säga was
I han as schlächts Gwüssa, wenn i miini Pflichta vergäss
Denn i han Ziit, aber nümmer zwenig für Nichta und Neff

I han an gschissana Chef und eigentlich a recht dämlichi Stell
Aber au zwenig, wenn i da Lüüt nu miini Märli verzell
I han Freud und wieder Ziil mit jedem kreativa Iifall
Nur Ärsch und Brüscht vor miar, wenn i aimol Viva iischalt

An Verstand, wo miar sait, dass′ um teil Sacha komisch stoht
Und drum han i kai Verständnis für Nazis und t Todesstrof
I han Rap und gib dur ihn au gwüssi Asichta wiiter
I han eu, kai blindi Massana wia Stalin und Hitler

I han dr starch Willa, t Lag vu allna zverstoh
I han t SVP-Wahlkampagna bis do
I han a sichri Exischtenz und i zahl für miin Staat
Han au as Sturmgwehr ufem Eschtrich und kai Ahnig für was


I hans guat, i han viil Chance, i han meh als i bruuch
I han grosses Glück, will jeda zweit im Elend versuuft
I han dr Iidruck, miar hän do all siit langem Bluat an da Händ
Doch au dr Glauba an t Veränderig und an z Guata im Mensch

I han wohl z Pech, dass is hüt mit allna Dama verspiila
Doch i han Sehnsucht noch jeder ainzelna Phasra vu ihra
I han Kontakt, nid grad viil, aber jo, i bruuch na schwär
Guat han i Üabig drin, so ztua, als ob i beschter Luuna wär

I han Hoffnig, natürli unbegründet, drum han i sie au
Han bald as Platinalbum, jedem Trottel gfallt üsa Sound
I han an ruhiga Produzent, wo all mit Tunes übertönt
Siini Beats hän Soul, i han Hüahnerhuut, wenn is khör

I han Anerkennig, han Disrespekt, han a Lächla für jeda
Han scho länger gnuag davo, über Rap zrappa und zreda
I han scho bald kai Idea und Energie meh für das
Doch solang spaar Lüüt dra Freud hän, han au i no miin Spass

I han meh als ai Intressa, gwüssi Träum und Engagement
Han meh Froga als Antworta, wenn i scho mol uf t Strossa gohn
I han kai Angst nochem Lizentiat jemols gross zverdiana
I han Angst, in üser Gsellschaft no dia gröscht Neurosa zkriaga


I han Geld gspart für a Reis, han aifach mol a Pausa nötig
Und i han as Rückflugticket. Weglaufa isch au kai Lösig
I han Fründa und Fründinna und easy Menscha um mi
I han nur Liabi für eu und dank eu a glänzendi Ziit