Isches das itz gsy? Songtext
von Dänu Extrem

Der Rase isch früsch gmäit, ds Outo glänzt vor Suberkeit
Der Gartezun isch wyss lackiert, d Solaraalag früsch montiert
D Hypothek isch scho fasch abzalt, der Wärchzügschopf fertigbout
Ds Bluemebeet lüchtet in bunter Pracht
Das het mi Frou letscht Samschti gmacht

Isches das jitz würklech gsy? U alli Tröim si scho verby
All die tolle Plän zu Stoub, verrottet underem Eicheloub
Isches das jitz würklech gsy? U all di Tröim si scho verby
All die feine Plän zu Brei, zermahle vom Alltagsmühlistei

D Chind si scho gross, d Grosschind si ou nümm so chly
Mi Frou und ig mir hei s no guet
Aber die schönschte Jahr si scho lang verby
Tsischtig Abe wird trainiert, täglech mit em Hund spatziert
Finanziell bini saniert, i s paar Jahr, wird i pensioniert
Aber

Isch es das jitz würklech gsy? U alli Tröim si scho verby
All die grosse Plän zu Sand, zerriebe dert am Aarestrand
Isch es das jitz würklech gsy? U alli Tröim si scho verby
All die wilde Plän zu Dräck, abgschmiert und abverreckt


Weisch no denn, wo mer abdrückt hei, genau gwüsst hei, was mir wei
Total abgfuckt und düregheit hei mer kämpft gäge die ganzi Schweinerei
E Schybe hie, dert e Spray, mir hei gschleglet mit der Bullerei
Vor em Morge si mir doch nie hei u hei gmeint mir syge nid allei
Wie di Aute wärde ou ne nei, bügle, bügle, suure Stei
Das het gschtunke wie n es fuls Ei
Und i weis no ganz genau, das mer gseit hei
Das isch ganz u gar nid das wo mir wei
Aber mit der Zyt, der ganze Raserei
Isch nüt meh übrig vo däm ganze Gschrei
Und ig blybe hie allei mit dere Fragerei

Isch das jitz würklech gsy? U alli Tröim si scho verby
All die tolle Plän zu Stoub, verrottet underem Eicheloub
Isches das jitz würklech gsy? U all di Tröim si scho verby
All die feine Plän zu Sand, verchätschet dert am Aarestrand

Isch es das, isch s das würklech gsy?
Isch das würklech Alles gsy?
Alli Plän zu Dräck abgschmiert und abverreckt
Isches das gsy?
Isch jitz das scho Alles gsy?
Isches das jitz würklech scho gsy?
Isch jitz Alles scho verby?