Och wat wor dat fröher schön doch en Colonia Songtext
von Willi Ostermann

Wat hät doch Köln sing Eigenaat verlore
Wie wor dat Levven he am Rhing su nett
Mer es sich selver nit mieh rääch em klore
Ov mer ′ne Fimmel oder keinen hät

Dä fremde Krom, et es doch zo bedoore
Als ahle Kölsche schöddelt mer d'r Kopp
Deiht mer sich bloß die Dänz vun hück beloore
Stüss einem jedesmol de Heimat op

Och wat wor dat fröher schön doch en Colonia
Wann der Franz mem Nies nom ahle Kohberg ging
Wann d′r Pitter Ärm en Ärm mem Appolonia
Stell vergnög om Heinweg ahn zu knuutsche fing


Die sechsmol zweiundzwanzig bare Pfennige
Dat wor ne Wochenluhn vun nem Commis
Dä wot verdanz, mer fohlt sich wie die Könige
De Zech zom Schluss bezahlte dann et Lis

Die Kavaliere leeten met sich handele
Wenn mer als Mädche Schleß un Kohldamp hat
Trook hä en Dösche met gebrannte Mandele
Die wohten dann gelötsch bis dat mer satt

Och wat wor dat fröher schön doch en Colonia
Wann der Franz mem Nies nom ahle Kohberg ging
Wann d'r Pitter Ärm en Ärm mem Appolonia
Stell vergnög om Heinweg ahn zu knuutsche fing

Wann d'r Pitter Ärm en Ärm mem Appolonia
Stell vergnög om Heinweg ahn zu knuutsche fing