Tuj la kompanar' Songtext
von Jacques Yvart

Ne apartenis al la skip′
De l' Meduzfloso tiu ŝip′
Famigu tion en haven'
En ĉiu haven'

Navigis ĝi sen avatar′
Kviete sur la granda mar′
Nomiĝis Tuj la Kompanar'
Tuj la Kompanar′

La "Fluctuat nec mergitur"
Ne 'stis por ĝi literatur′
Malplaĉu al la perfidul'
Ĉiu perfidul′

Matrosoj kaj la kapitan'
Ne estis fiaĉula klan'
Sed vera samideanar′
Samideanar′


Inklinis ili ne al luks'
Nek estis Kastor′ kaj Poluks'
Nek el Sodomo kaj Gomor′
Sodom' kaj Gomor′

Ne similec' al simpati'
Inter Montenj′ kaj Boesi′
Nur amuziĝo jen la far'
De la Kompanar′

En ĝi troviĝis ne anĝel'
Konante pri la dia cel′
Nur amikeco en farfar'
Amo sen kompar′

Ĵan', Pier', Pol′, kaj kompani′
Jen ĝia nura litani'
Kaj ĝiaj kredo kaj deklar′
Jen la Kompanar'

Se ekblovegis la tempest′
Stariĝis tuj la amikec'
Ĝi rolis samkiel kompas′
Samkiel kompas'


Se ekminacis la danĝer'
Kaj ŝanceliĝis la esper′
Ekvelis for de la koŝmar′
Tuj la Kompanar'

Al rendevu′ de l' amikec′
Maloftis iu neĉeest'
Se homo mankis sur ferdek′
Kulpis mortopek'

Sed poreterne en la mar'
Malplena truo restis ĉar
Li mankis plue jar′ post jar′
En la Kompanar'

Multegajn ŝipojn uzis mi
Sed unu nur memoras mi
Ŝipantan en tutsolidar′
En tutsolidar'

Navigis ĝi sen avatar′
Kviete sur la granda mar'
Nomiĝis Tuj la Kompanar′
Tuj la Kompanar'