A foghi spenti Songtext
von Bottega Baltazar

Mostrame i to′ mestieri
Fame vedare dove che i xé
Tira fora i to salvanei
Che vorìa essare aria anca mi

Pa' compagnarme col temporae
E barufare coe campane
A fin de avrie essare vento
E basare i fiori de soto ae sotane

Vorìa essare la malombra
Quando che i torna da l′ostaria
Nebia de note traverso campi
El canto del fiume in mexo aea via

Me scondarìa nee ragnatee
Po' come un gato te seguirìa
Parché me piaxe starte rente
Pa farte e fusa e po' scampare via


E quando sona a mexanote
Mentre te dormi te spiarìa
Che so curioso de i to′ segreti
Che so invidioso dea to′ magia

Come a marea ti te senti e lune
E coe calende te cambi el sangue
Come a marea ti te vien e te vè
E mi so' un reìto in boca ae alghe

E anca se mi gò un vecio compare
Che go incontrà al crocevia
Che me ga dà ea man sanca
E o go sempre intorno nol va più via

Ti no te ghe da aver paura
Parché e raixe più che e xe storte
Più e va profonde dentro a tera
E più e ga a scorsa dura

E quando sona a mexanote
Mentre te dormi te spiarìa
Che so curioso de i to′ segreti
Che so invidioso dea to' magia


E se a luna ze un fil de fero
I pai del stecato pare denti
Col me tabaro casa par casa
′Ndarò rimpissare i foghi spenti

E quando sona a mexanote
Mentre dormì ve spiarìa
Che so curioso de i vostri segreti
Che so invidioso dea vostra magia

E se a luna ze un fil de fero
I pai del stecato pare denti
Col me tabaro casa par casa
'Ndarò rimpissare i foghi spenti

Spandare china no fa note
Ghe xe tre strighe che fia a lana
No fa note na buxia
Stua a candea che femo nana

A note xe onga come ′na conta
Ghe ze tre strighe che fia a lana
Marìo mojere, pare e fioeo
Stua a candea che femo nana