Naguflue Songtext
von Tinu Heiniger

En Amsle singt am Abe zue
Ir Schlucht ruuschet der Bach
E Flüger flügt verby - när Rue
E Spächt chlopfet ganz nach

E Chemp löst sech vor Naguflue
U polet ds Loch zdürab
I lose u tue d′ Ouge zue
U schaute müglechscht ab

Jetz ghöri nume nö my Schnuuf
U gseh ufzmau ir Schlucht
Vor mir: Da touche Mönsche uf
Mängs tuusig - uf der Flucht

Was wei die hie? I wirde muff
Wohär chöme di Lüt?
U langsam gö mir d' Ouge uf
I luege - u gseh nüt!


Ke Mönsch ir Schlucht ung, gottseidank!
Was isch? Spinnt′s mir im Gring
Di Tagesschou macht eim ganz chrank
Di Not! Di Angscht! Di Ching!

Langsam wird's fyschter hie im Waud
I rouke afa eis
Lege der Pulli a, 's wird chaut
D′ Gedanke gö uf d′ Reis

Ja! Mi verfouge au die Bricht
"Chrieg, Sieg u Gift z Kuwait!"
No gäng däm Hussein sys Gsicht
Wär het dert wän vor wäm befreit?

U wär tuet wiviu Stütz
O hie bi üs ufene Bank?
Wäm het dä Chrieg dert gnützt?
U wie tüür füllt me hie sy Tank?

Es Bild: E Laschter vou mit Brot
U Hunderti vo Lüt!
Die znächscht, di schlö enang fasch ztot
De angere git's nüt!


Uf Steine, zwüsche kahle Böim
Gä Manne d′ Waffe ab!
U Froue lege ihri Tröim
U Ching ids früsche Grab!

Di Tröim sy schön, di Tröim sy aut
Si heisse Mönscherächt
U Liebi, Toleranz - nid Gwaut
Nid Herre u nid Chnächt!

E Chemp löst sich vor Naguflue
Vo wyt tönt d' Outobahn
U jetz flügt d′ Amsle uf - u lue!
Si flügt nach Kurdistan!